iPad ដែលចេញឆ្នាំ ២០២៤ នឹងបំពាក់ដោយអេក្រង់ Amoled មានកម្រាស់ស្តើង និងស្រាលបំផុត
មានពាក្យចចាមអារ៉ាមថា Apple នឹងនាំយកអេក្រង់ OLED ទៅបំពាក់លើត្រកូល iPad របស់ខ្លួនក្នុងរយៈពេលប៉ុន្មានឆ្នាំខាងមុខ ខណៈ Samsung និង LG ជាអ្នកផ្គត់ផ្គង់អេក្រង់សំខាន់ កំពុងធ្វើការលើបន្ទះ OLED ថ្មីដែលត្រូវបានរចនាឡើងជាពិសេសសម្រាប់ iPads ឆ្នាំ ២០២៤ របស់ Apple។

ទន្ទឹមនឹងអេក្រង់ថ្មីនោះ បច្ចេកវិទ្យានៃការផលិតក៏មានការកែឆ្នៃថ្មីដោយប្រើប្រាស់សារធាតុហ្គាសគីមី ដើម្បីទៅលុបបំបាត់ស្រទាប់ ដែលមិនបានការនៅលើបន្ទះ TFT។ ការធ្វើបែបនេះដែរ នឹងជួយឲ្យអេក្រង់ OLED ដែលត្រៀមនឹងបំពាក់លើ iPad កាន់តែមានទម្ងន់ស្រាល និងស្តើង។

គួរបញ្ជាក់ផងដែរថា ក្រុមហ៊ុន Apple ក៏កំពុងសាកល្បងលើការបង្កើតថ្នាំកូតពិសេស សម្រាប់អេក្រង់ ធ្វើឲ្យកាន់តែធន់ ប្រើប្រាស់បានយូរ។ ហើយ Apple ត្រូវបានគេរាយការណ៍ថាកំពុងធ្វើតេស្តគំរូដំបូងនៃ iPad OLED របស់ខ្លួនផងដែរ៕

ប្រភព៖ Sabay News